Page 1 | next>
ARGUMENTUM
Fractis gemina pugna Latinis, Turnus cum Aenea singulari certamine dimicare statuit. Solenni sacramento conditiones certaminis foedusque a Latino, Aenea, Turnoque sancitur. Foedus a Juturna, Turni sorore, Junonis impulsu disturbatur: primusque Tolumnius, falso augurio victoriam suis pollicitus, Trojanos invadit. Aeneas sagitta vulneratus excedere cogitur e praelio: quo absente maximam stragem Turnus edit. Venus dictamno herba vulnus Aeneae sanat. Is, refectis viribus, reversus ad pugnam Turnum nominatim vocat. Sed cum Juturna, excusso Turni auriga Metisco, currum ejus moderaretur, et ab Aeneae occursu detorqueret, ne congredi simul possent; Aeneas admoto ad urbis moenia exercitu, in propugnacula ignem conjicit. Hinc Amata, Turnum occisum rata, laqueo vitam sibi adimit. Turnus, ne urbs in hostium potestatem veniret, ad singulare certamen redit. Pugnant Aeneas et Turnus: Aeneas victor, cum Turni jugulo immineret, jamque ipsius precibus motus ad misericordiam deflecteret; viso in ejus humeris Pallantis balteo, repente exardescit, hostemque interficit.
