Page 1 | next>
Epigramma Ipsius
Qui modo Nasonis fueramus quinque libelli,
tres sumus; hoc illi praetulit auctor opus.
ut iam nulla tibi nos sit legisse voluptas,
at levior demptis poena duobus erit.
Nos qui fueramus nuper quinque libelli Nasonis, tres sumus: auctor magis probauit hoc opus illo. Quamuis iam nulla tibi contingat uoluptas nos legisse; at labor minor erit duobus sublatis.
ELEGIA I.
Arma gravi numero violentaque bella parabam
edere, materia conveniente modis.
Cogitabam proferre arma et bella saeua metro grandiloquo, materia accommodata modulationibus.
par erat inferior versus—risisse Cupido
dicitur atque unum surripuisse pedem.
Versus posterior erat aequalis: Cupido perhibetur risisse, atque furtim sustulisse unum pedem.
'Quis tibi, saeve puer, dedit hoc in carmina iuris? 5
Pieridum vates, non tua turba sumus.
Quis tibi tribuit hoc imperii in uersus, puer crudelis? Nos Poëtae sumus coetus Musarum, non tuus.
quid, si praeripiat flavae Venus arma Minervae,
ventilet accensas flava Minerva faces?
quis probet in silvis Cererem regnare iugosis,
lege pharetratae Virginis arva coli? 10
Quid, si Venus auferat arma flauae Mineruae, Minerua flaua agitet taedas inflammatas? Quis laudet Cererem imperare in siluis montosis? agros subigi lege uirginis pharetra instructae?
crinibus insignem quis acuta cuspide Phoebum
instruat, Aoniam Marte movente lyram?
sunt tibi magna, puer, nimiumque potentia regna;
cur opus adfectas, ambitiose, novum?
an, quod ubique, tuum est? tua sunt Heliconia tempe? 15
vix etiam Phoebo iam lyra tuta sua est?
Quis armet Phoebum decorum crinibus mucrone acuto, Marte pulsante lyram Aoniam? Obtines magna imperia, puer, et nimium ualida. Quamobrem, ambitiose, appetis insolitum opus? An tuum est quodcumque est ubique? Tempe Heliconia suntne tua? Vix etiam sua lyra est iam secura Phoebo?
cum bene surrexit versu nova pagina primo,
attenuat nervos proximus ille meos;
nec mihi materia est numeris levioribus apta,
aut puer aut longas compta puella comas.' 20
Cum noua pagina bene aucta est uersiculo primo, ille statim minuit chordas meas. Nec materiam habeo idoneam modis tenuioribus, seu puerum, seu puellam cuius sint ornati prolixi capilli.
Questus eram, pharetra cum protinus ille soluta
legit in exitium spicula facta meum,
lunavitque genu sinuosum fortiter arcum,
'quod' que 'canas, vates, accipe' dixit 'opus!'
Me miserum! certas habuit puer ille sagittas. 25
uror, et in vacuo pectore regnat Amor.
Conquestus eram; cum ille continuo expedita pharetra dispexit sagittas paratas in meam ruinam; et genu tetendit strenue arcum curuatum; et inquit: Tene, poëta, opus quod cantes. Hei mihi! ille puer habuit spicula certa. Ardeo; et Amor imperat in corde inani.
Sex mihi surgat opus numeris, in quinque residat:
ferrea cum vestris bella valete modis!
cingere litorea flaventia tempora myrto,
Musa, per undenos emodulanda pedes! 30
Opus mihi initium ducat sex pedibus, in quinque desinat. Bella dura, discedite cum uestris modis. Musa, fingenda per numeros undenos, redimitor tempora flauentia myrto littorea.
Page 1 | next>
