<back | Page 15 | Liber II >>
ELEGIA XV.
Quid mihi Livor edax, ignavos obicis annos,
ingeniique vocas carmen inertis opus;
non me more patrum, dum strenua sustinet aetas,
praemia militiae pulverulenta sequi,
nec me verbosas leges ediscere nec me 5
ingrato vocem prostituisse foro?
Quamobrem, maligna inuidia, mihi exprobras aetatem desidiosam, et nominas carmen opus ingenii desidis? Cur exprobras, me non captare munera puluerulenta militiae more maiorum, dum anni uirentes patiuntur, nec me perdiscere leges garrulas, nec me prostituisse uocem foro ingrato?
Mortale est, quod quaeris, opus. mihi fama perennis
quaeritur, in toto semper ut orbe canar.
Laus quam sectaris est fragilis: mihi aeternus honor expetitur; ut semper celebrer in omnibus terris.
vivet Maeonides, Tenedos dum stabit et Ide,
dum rapidas Simois in mare volvet aquas; 10
vivet et Ascraeus, dum mustis uva tumebit,
dum cadet incurva falce resecta Ceres.
Maeonides celebrabitur, quamdiu Tenedos et Ida manebit; quamdiu Simois propellet aquas admissas in aequor. Celebrabitur etiam Ascraeus, quamdiu uua turgebit mustis: quamdiu Ceres sternetur recisa falce recurua.
Battiades semper toto cantabitur orbe;
quamvis ingenio non valet, arte valet.
Battiades semper celebrabitur per totum orbem terrarum; quanquam magnus non est ingenio, magnus est arte.
nulla Sophocleo veniet iactura cothurno; 15
cum sole et luna semper Aratus erit;
dum fallax servus, durus pater, inproba lena
vivent et meretrix blanda, Menandros erit;
Ennius arte carens animosique Accius oris
casurum nullo tempore nomen habent. 20
Nullum damnum accedet cothurno Sophocleo. Aratus semper erit cum sole et Luna. Quamdiu seruus dolosus, pater seuerus, scelesta lena, quamdiu scortum illecebrosum durabunt, Menander perstabit. Ennius arte destitutus, Accius oris sublimis, habent famam nunquam interituram.
Varronem primamque ratem quae nesciet aetas,
aureaque Aesonio terga petita duci?
Quodnam saeculum ignorabit Varronem et primam nauem, et uellera aurea quaesita a duce Aesonio?
carmina sublimis tunc sunt peritura Lucreti,
exitio terras cum dabit una dies;
Tityrus et segetes Aeneiaque arma legentur, 25
Roma triumphati dum caput orbis erit;
donec erunt ignes arcusque Cupidinis arma,
discentur numeri, culte Tibulle, tui;
Gallus et Hesperiis et Gallus notus Eois,
et sua cum Gallo nota Lycoris erit. 30
Carmina elati Lucretii tunc sunt interitura, cum una dies terras in ruinam trahet. Tityrus et segetes et arma Aeneia legentur, quamdiu, Roma, eris caput orbis triumphati. Quamdiu ignes et sagittae erunt tela Cupidinis, uersus tui addiscentur, polite Tibulle. Gallus, et Lycoris sua cum Gallo, erit clarus ad ortum et occasum.
Ergo, cum silices, cum dens patientis aratri
depereant aevo, carmina morte carent.
Igitur, cum saxa, cum dens duri aratri deterantur tempore, uersus sunt immortales.
cedant carminibus reges regumque triumphi,
cedat et auriferi ripa benigna Tagi!
Reges et Regum triumphi cedant carminibus; cedat etiam diues ripa Tagi auriferi.
vilia miretur vulgus; mihi flavus Apollo 35
pocula Castalia plena ministret aqua,
sustineamque coma metuentem frigora myrtum,
atque a sollicito multus amante legar!
Vulgus suspiciat contemnenda: aureus Apollo mihi praebeat pocula plena aquae Castaliae. Et redimiar capillos myrto timenti frigora; et plurimus legar ab amante anxio.
pascitur in vivis Livor; post fata quiescit,
cum suus ex merito quemque tuetur honos. 40
Inuidia rodit uiuentes; desinit post mortem, cum sua laus defendit unumquemque pro merito.
ergo etiam cum me supremus adederit ignis,
vivam, parsque mei multa superstes erit.
Ergo celebrabor etiam, postquam ultimus ignis me consumserit; et magna pars mei supererit.
<back | Page 15 | Liber II >>
