<back | Page 15
ELEGIA XV.
Quaere novum vatem, tenerorum mater Amorum!
raditur hic elegis ultima meta meis;
quos ego conposui, Paeligni ruris alumnus —
nec me deliciae dedecuere meae —
siquid id est, usque a proavis vetus ordinis heres,
non modo militiae turbine factus eques.
Mater mollium amorum, quaere alium Poëtam: ultima meta hic teritur meis Elegis; quos ego alumnus agri Peligni conscripsi: nec mei lusus mihi dedecori fuerunt; mihi inquam, si id est aliquid, qui sum antiquus haeres ordinis equestris usque a proauis, non nuper creatus eques motibus belli.
Mantua Vergilio, gaudet Verona Catullo;
Paelignae dicar gloria gentis ego,
quam sua libertas ad honesta coegerat arma,
cum timuit socias anxia Roma manus.
Mantua sibi plaudit Virgilio, Verona Catullo: ego perhibebor laus nationis Pelignae: quam sua libertas impulerat ad arma decora, cum Roma solicita metuit manus sociales.
atque aliquis spectans hospes Sulmonis aquosi
moenia, quae campi iugera pauca tenent,
'Quae tantum' dicat 'potuistis ferre poetam,
quantulacumque estis, vos ego magna voco.'
Atque aliquis peregrinus intuens muros Sulmonis aquatici, qui complectuntur pauca iugera agri, Qui, inquiet, potuistis sustinere tantum Poëtam, quantulicumque estis, ego uos nomino magnos.
Culte puer puerique parens Amathusia culti.
aurea de campo vellite signa meo!
Splendide puer, et mater Amathusia pueri splendidi, tollite signa splendida de meo agro.
corniger increpuit thyrso graviore Lyaeus:
pulsanda est magnis area maior equis.
Corniger Lyaeus me perculit thyrso maiore: uastior campus est premendus magnis equis.
inbelles elegi, genialis Musa, valete,
post mea mansurum fata superstes opus.
Elegi molles, genialis Musa, opus duraturum superstes post meum obitum, ualete.
<back | Page 15
