<back | Page 105 | next>
ELEGIA XXI.
GALLUS LOQUITUR.
Tu, qui consortem properas evadere casum,
Miles ab Etruscis saucius aggeribus,
Quid nostro gemitu turgentia lumina torques?
Pars ego sum vestrae proxima militiae.
Sic, te servato, possint gaudere parentes,
Haec soror Acca tuis sentiat e lacrymis,
Gallum, per medios ereptum Caesaris enses,
Effugere ignotas non potuisse manus:
Ut, quaecumque super dispersa invenerit ossa
Montibus Etruscis, haec sciat esse mea.
Tu miles, qui vulneratus ab aggeribus Tuscis festinas communem mihi tecum effugere cladem, cur oculos lacrymis tumentes mei desiderio huc illuc torques? Ego nuper fui pars vestrae militiae. Ita parentes tui te salvo et incolumi laetari possint. Soror mea cognoscat e tuis fletibus rem ita fuisse gestam, Gallum nempe, e mediis Caesaris armis servatum, nequivisse manus incognitas evadere. Quisquis autem in montibus Etruscis dissipata et sparsa ossa repererit, ista mea esse intelligat.
