Page 1 | next>
I.
Synthesibus dum gaudet eques dominusque senator
Dumque decent nostrum pillea sumpta Iovem;
Nec timet aedilem moto spectare fritillo,
Cum videat gelidos tam prope verna lacus:
Divitis alternas et pauperis accipe sortes:
Praemia convivae dent sua quisque suo.
Dum syntheses placent equiti, et domino senatui, et dum noster Iupiter decore gestat pileum, nec uerna metuit aspicere aedilem agitato fritillo, cum iam prope spectet frigidos lacus: disce sortes alternas locupletis atque egeni: quisque largiatur suo conuiuae sua munera.
'Sunt apinae tricaeque et si quid vilius istis.'
Quis nescit? vel quis tam manifesta negat?
Sunt nugae, et ineptiae, et si quid uilius istis. Quis ignorat, uel quis inficiatur rem tam euidentem?
Sed quid agam potius madidis, Saturne, diebus,
Quos tibi pro caelo filius ipse dedit?
At, o Saturne, quid melius faciam temulentis diebus, quos tibi concessit filius ipse pro caelo?
Vis scribam Thebas Troiamve malasve Mycenas?
'Lude,' inquis, 'nucibus'. Perdere nolo nuces.
Placetne scribam casus Thebarum, et Troiae, et improbarum Mycenarum? Lude nucibus, ais: nolo amittere nuces.
II.
Quo vis cumque loco potes hunc finire libellum:
Versibus explicitumst omne duobus opus.
Lemmata si quaeris cur sint adscripta, docebo:
Ut, si malueris, lemmata sola legas.
Quocumque loco potes absoluere hunc librum, omne hoc opus absolutum est duobus carminibus. Si rogas cur tituli sint ascripti, dicam: ut legas solos titulos, si libuerit.
III. Pugillares citrei
Secta nisi in tenues essemus ligna tabellas,
Essemus Libyci nobile dentis onus.
Nisi essemus ligna diuisa in tenues laminas, essemus onus praestans dentis eburnei.
IV. Quinquiplices
Caede iuvencorum domini calet area felix,
Quinquiplici cera cum datur altus honos.
Beata altaria domini calent tauris immolatis, cum summus honor defertur quincuplici cera.
V. Pugillares eborei
Languida ne tristes obscurent lumina cerae,
Nigra tibi niveum littera pingat ebur.
Ne cerae maestae officiant oculis debilitatis, ebur candidum pingatur litera atra.
VI. Triplices
Tunc triplices nostros non vilia dona putabis,
Cum se venturam scribet amica tibi.
Cum amica ad te scribit se affuturam, tunc non existimabis triplices nostros munera contemnenda.
VII. Pugillares membranei
Esse puta ceras, licet haec membrana vocetur:
Delebis, quotiens scripta novare voles.
Crede esse ceras, quamuis haec membrana appelletur: obliterabis, quoties placebit scribere res nouas.
VIII. Vitelliani
Nondum legerit hos licet puella,
Novit quid cupiant Vitelliani.
Quamuis puella nondum legerit hos, scit quid uelint Vitelliani.
IX. Idem
Quod minimos cernis, mitti nos credis amicae.
Falleris: et nummos ista tabella rogat.
Quod nummos uides, putas nos mitti ad amicam: hallucinaris, et haec tabella petit nummos.
X. Chartae maiores
Non est, munera quod putes pusilla,
Cum donat vacuas poeta chartas.
Non sunt dona quae credis, o puella, cum uates donat inanes chartas.
Page 1 | next>
