CLXXXI. Leandros marmoreus
Clamabat tumidis audax Leandros in undis:
'Mergite me, fluctus, cum rediturus ero.'
Audax Leander exclamabat in undis commotis: O fluctus, immergite me cum reuersurus ero.
CLXXXII. Sigillum gibberi fictile
Ebrius haec fecit terris, puto, monstra Prometheus:
Saturnalicio lusit et ipse luto.
Opinor, temulentus Prometheus finxit haec portenta terris: et ipse lusit luto Saturnalicio.
CLXXXIII. Homeri Batrachomachia
Perlege Maeonio cantatas carmine ranas
Et frontem nugis solvere disce meis.
Euolue ranas cantatas uersibus Homeri, et disce exhilarare frontem meis ineptiis.
CLXXXIV. Homerus in pugillaribus membraneis
Ilias et Priami regnis inimicus Ulixes
Multiplici pariter condita pelle latent.
Ilias et Ulysses aduersarius regnis Priami condita multiplici pelle simul occultantur.
CLXXXV. Vergili Culex
Accipe facundi Culicem, studiose, Maronis,
Ne nucibus positis ARMA VIRUMQUE legas.
O studiose, accipe Culicem Maronis diserti: ne derelictis iocis legas arma uirumque.
CLXXXVI. Vergilius in membranis
Quam brevis inmensum cepit membrana Maronem!
Ipsius vultus prima tabella gerit.
Quam breuis membrana includit immensum Maronem! Illius effigies expressa est in prima tabella.
CLXXXVII. MENANDROY THAIS
Hac primum iuvenum lascivos lusit amores;
Nec Glycera pueri, Thais amica fuit.
Haec primum decepit lasciuos amores adolescentum, nec Glycere, sed Thais fuit uere amica.
CLXXXVIII. Cicero in membranis
Si comes ista tibi fuerit membrana, putato
Carpere te longas cum Cicerone vias.
Si comitem habueris hanc membranam, crede te suscipere longum iter cum Cicerone.
CLXXXIX. Monobyblos Properti
Cynthia - facundi carmen iuvenale Properti -
Accepit famam, non minus ipsa dedit.
Cynthia carmen iuuenile diserti Propertii accepit famam, nec minus ipsa dedit.
CXC. Titus Livius in membranis
Pellibus exiguis artatur Livius ingens,
Quem mea non totum bibliotheca capit.
Pellibus exiguis continetur immensus Liuius, quem non includit totum mea bibliotheca.
