XI. Chartae epistulares
Seu leviter noto, seu caro missa sodali
Omnes ista solet charta vocare suos.
Ista charta seu missa ad hominem mediocriter cognitum, seu ad socium dilectum, consueuit omnes appellare suos.
XII. Loculi eborei
Hos nisi de flava loculos implere moneta
Non decet: argentum vilia ligna ferant.
Non conuenit implere hos loculos nisi moneta flaua. Ligna contemnenda gestent argentum.
XIII. Loculi lignei
Si quid adhuc superest in nostri faece locelli,
Munus erit. Nihil est: ipse locellus erit.
Si quid adhuc reliqui est in faece nostri locelli, donabo: nihil est, donabo ipsam crumenam.
XIV. Tali eborei
Cum steterit nullus vultu tibi talus eodem,
Munera me dices magna dedisse tibi.
Cum nullus talus tibi steterit eadem figura, inquies te a me affectum fuisse magnis donis.
XV. Tesserae
Non sim talorum numero par tessera, dum sit
Maior, quam talis, alea saepe mihi.
Ego tessera uincar numero talorum, dum saepe mihi sit maior fortuna, quam talis.
XVI. Turricula
Quae scit compositos manus improba mittere talos,
Si per me misit, nil nisi vota feret.
Manus dolosa quaerit iacere talos compositos: si per me iecit, nihil facit nisi uota.
XVII. Tabula lusoria
Hac mihi bis seno numeratur tessera puncto;
Calculus hac gemino discolor hoste perit.
Hic numero tesseram duodecim punctis: hic discolor calculus uincitur a gemino hoste.
XVIII. Calculi
Insidiosorum si ludis bella latronum,
Gemmeus iste tibi miles et hostis erit.
Si ludis pugnam latronum fraudulentorum, tu habebis istum gemmeum militem et hostem.
XIX. Nuces
Alea parva nuces et non damnosa videtur;
Saepe tamen pueris abstulit illa natis.
Alea leuis nec damnosa uidetur in nucibus: nihilominus saepe illa nudauit nates puerorum.
XX. Theca libraria
Sortitus thecam calamis armare memento:
Cetera nos dedimus, tu leviora para.
Nactus thecam recordare ornare illam calamis: nos donauimus reliqua, tu instrue leuiora.
