LXXXI. Pera
Ne mendica ferat barbati prandia nudi
Dormiat et tetrico cum cane, pera rogat.
Pera orat, ne portet rogata prandia barbati nudi, nec dormiat cum foedo cane.
LXXXII. Scopae
In pretio scopas testatur palma fuisse.
Otia sed scopis nunc analecta dedit.
Palma manifestat scopas fuisse aestimatas: at nunc scopae aestimabuntur propter analecta.
LXXXIII. Scalptorium eboreum
Defendet manus haec scapulas mordente molesto
Pulice, vel si quid pulice sordidius.
Haec manus tuebitur scapulas mordente importuno pulice, uel si quid est turpius pulice.
LXXXIV. Manuale
Ne toga barbatos faciat vel paenula libros,
Haec abies chartis tempora longa dabit.
Ne toga aut paenula efficiat libros uillosos, haec abies diu seruabit chartas.
LXXXV. Lectus pavoninus
Nomina dat spondae pictis pulcherrima pinnis
Nunc Iunonis avis, sed prius Argus erat.
Spondae denominantur a formosissima nunc aue Iunonis: sed antea Argus erat.
LXXXVI. Ephippium
Stragula succincti venator sume veredi:
Nam solet a nudo surgere ficus equo.
O uenator, accipe stragula ueredi succincti: nam ficus solet effici ab equo nudo.
LXXXVII. Stibadia
Accipe lunata scriptum testudine sigma.
Octo capit; veniat quisquis amicus erit.
Accipe sigma pictum testudine lunata: octo continet: accedat quisquis erit amicus.
LXXXVIII. Gustatorium
Femineam nobis cherson si credis inesse,
Deciperis: pelagi mascula praeda sumus.
Si putas nobis inesse cherson femineam, falleris: sumus praeda mascula maris.
LXXXIX. Mensa citrea
Accipe felices, Atlantica munera, silvas:
Aurea qui dederit dona, minora dabit.
Accipe pretiosa ligna dona Atlantica: qui affecerit muneribus aureis, afficiet minoribus.
XC. Mensa acerna
Non sum crispa quidem nec silvae filia Maurae,
Sed norunt lautas et mea ligna dapes.
Equidem non sum crispata, nec nata in silua Maura: sed et epulae praestantes cognitae sunt meis lignis.
