<back | Page 24
CXVI.
Hoc nemus aeterno cinerum sacrauit honori
Faenius et culti iugera pulchra soli.
Hoc tegitur cito rapta suis Antulla sepulcro,
hoc erit Antullae mixtus uterque parens.
Si cupit hunc aliquis, moneo, ne speret agellum: 5
perpetuo dominis seruiet iste suis.
Faenius perpetuo decore cinerum dedicauit hunc lucum, et pauca iugera agri exculti. Antulla suis uelociter ablata conditur hoc tumulo, eodem uterque parens coiunctus erit Antullae. Si aliquis expetit hunc agellum, suadeo ne speret illum; iste seruiet suis dominis aeternum.
CXVII.
Occurris quotiens, Luperce, nobis,
'Vis mittam puerum' subinde dicis,
'cui tradas epigrammaton libellum,
lectum quem tibi protinus remittam?'
O Luperce, quoties nobis uenis obuiam, statim interpellas, Placet mittam seruum tibi, cui des librum Epigrammatum, quem cum legero statim remittam?
Non est quod puerum, Luperce, uexes. 5
Longum est, si uelit ad Pirum uenire,
et scalis habito tribus, sed altis.
O Luperce, non est quod defatiges seruum. Longinquum est, si cogitet uenire ad Pyrum, et domicilium habeo tribus scalis, sed excelsis.
Quod quaeris propius petas licebit.
Argi nempe soles subire Letum:
contra Caesaris est forum taberna 10
scriptis postibus hinc et inde totis,
omnis ut cito perlegas poetas:
illinc me pete. Nec roges Atrectum —
hoc nomen dominus gerit tabernae —;
de primo dabit alteroue nido 15
rasum pumice purpuraque cultum
denaris tibi quinque Martialem.
'Tanti non es' ais? Sapis, Luperce.
Poteris poscere propius quod rogas: nimirum consueuisti adire Argiletum. Est officina e regione fori Caesaris, hinc et inde ianuis totis inscriptis, ut celeriter perlegas omnes Poëtas. Illinc posce me, ne quaeras Atrectum: sic uocatur dominus tabernae: denariis quinque de primo aut secundo nido tradet tibi Martialem abrasum pumice, et purpura ornatum. Non tanti uales, inquis: O Luperce, sapiens es.
CXVIII.
Cui legisse satis non est epigrammata centum,
nil illi satis est, Caediciane, mali.
O Caeciliane, cui non sufficit euoluisse centum Epigrammata, nullum illi malum sufficit.
<back | Page 24
