Page 0 | next>
Have, mi Torani, frater carissime. Epigramma, quod extra ordinem paginarum est, ad Stertinium clarissimum virum scripsimus, qui imaginem meam ponere in bibliotheca sua voluit. De quo scribendum tibi putavi, ne ignorares Avitus iste quis vocaretur. Vale et para hospitium.
Ave, mi Turani, frater dilectissime. Scripsimus ad Stertinum uirum clarissimum Epigramma quod est extra ordinem paginarum, qui uoluit collocare imaginem meam in sua bibliotheca. De quo scribendum ad te existimaui, ne ignorares, quis iste Auitus nominaretur. Vale, atque adorna hospitium.
Note, licet nolis, sublimi pectore vates,
cui referet serus praemia digna cinis,
hoc tibi sub nostra breve carmen imagine vivat,
quam non obscuris iungis, Avite, viris:
'Ille ego sum nulli nugarum laude secundus 5
quem non miraris, sed - puto -, lector, amas.
Maiores maiora sonent: mihi parva Iocuto
sufficit in vestras saepe redire manus.
Non te occultabis Poëta sublimi pectore, quem merita mercede donabit mors tarda. O Auite, breue hoc carmen tibi uiuat sub nostra imagine, quam iungis praestantibus uiris. Ille ego sum nulli secundus laude nugarum, quem non miraris, at, opinor, diligis, o lector. Maiores canant maiora, satis est mihi canenti parua, attrectari manibus uestris.
Page 0 | next>
