VI.
Dicere de Libycis reduci tibi gentibus, Afer,
continuis volui quinque diebus Have:
'Non vacat' aut 'dormit' dictum est bis terque reverso.
Iam satis est: non vis, Afer, havere: vale.
O Afer, quinque diebus consecutis uolui dicere salutem tibi reuerso ex Africa. Responsum est mihi reuerso bis et ter; non uacat, uel dormit. Iam sufficit: O Afer, non uis auere: uale.
VII.
Tamquam parva foret sexus iniuria nostri
foedandos populo prostituisse mares,
iam cunae lenonis erant, ut ab ubere raptus
sordida vagitu posceret aera puer:
inmatura dabant infandas corpora poenas. 5
Non tulit Ausonius talia monstra pater,
idem qui teneris nuper succurrit ephebis,
ne faceret steriles saeva libido viros.
Quasi esset parua iniuria sexus nostri, prostituere populo mares contaminandos; iam cunabula pertinebant ad lenonem, ut puer ereptus ab ubere peteret turpem pecunuam suo uagitu. Corpora immatura luebant poenas infandas. Pater Italiae non passus est talia portenta: idem qui nuper subuenit delicatis pueris, ne crudelis libido faceret steriles uiros.
Dilexere prius pueri iuvenesque senesque,
at nunc infantes te quoque, Caesar, amant. 10
Pueri, iuuenes, et senes amauerunt te antea; sed nunc, o Caesar, infants etiam diligunt te.
VIII.
Nil tibi legavit Fabius, Bithynice, cui tu
annua, si memini, milia sena dabas.
plus nulli dedit ille: queri, Bithynice, noli:
annua legavit milia sena tibi.
O Bithynice, Fabius nihil tibi legauit, cui tu donabas sex millia annua, si memini. Ille nulli donauit plus: O Bithynice, noli conqueri: tibi legauit sex millia annua.
IX.
Cenes, Canthare, cum foris libenter,
damas et maledicis et minaris.
deponas animos truces monemus:
liber non potes et gulosus esse.
O Canthare, cum libenter cenes foris, uociferaris, et obtrectas, et minaris. Suademus exuas mentem ferocem: nequis esse liber, atque helluo.
X.
Nubere vis Prisco: non miror, Paula; sapisti.
ducere te non vult Priscus: et ille sapit.
