<back | Page 21
CI.
Appia, quam simili venerandus in Hercule Caesar
consecrat, Ausoniae maxima fama viae,
si cupis Alcidae cognoscere facta prioris,
disce: Libyn domuit raraque poma tulit,
peltatam Scythico discinxit Amazona nodo, 5
addidit Arcadio terga leonis apro,
O Appia, maximum decus uiarum Italiae, quam consecrat Caesar colendus sub imagine Herculis, si uis cognoscere gesta prioris Alcidae, accipe: subegit Libyn, abstulit poma aurea: detraxit Amazoni peltatae cingulum Scythicum: adiunxit terga leonis apro Arcadio.
aeripedem silvis cervum, Stymphalidas astris
abstulit, a Stygia cum cane venit aqua,
Abripuit ceruum aeripedem siluis, et Stymphalidas aquis: ab Inferis rediit cum cane Cerbero.
fecundam vetuit reparari mortibus hydram,
Hesperias Tusco lavit in amne boves. 10
Non passus est hydram renouari crescentem necibus: lauit boues Hispanas in anne Tusco.
Haec minor Alcides: maior quae gesserit audi,
sextus ab Albana quem colit arce lapis.
Minor Alcides fecit haec. Disce, quae fecerit maior, qui colitur ad sextum milliarium ab arce Albana.
adseruit possessa malis Palatia regnis,
prima suo gessit pro Iove bella puer;
solus Iuleas cum iam retineret habenas, 15
tradidit inque suo tertius orbe fuit;
cornua Sarmatici ter perfida contudit Histri,
sudantem Getica ter nive lavit equum;
Liberauit palatia occupata a malo principe; puer gessit prima bella pro suo Ioue. Cum iam solus retineret habenas Imperatorias, tradidit illas, et tertius administrauit suum imperium. Ter fregit perfida cornua Danubii Sarmatici: ter niue Getica lauit equum sudantem.
saepe recusatos parcus duxisse triumphos
victor Hyperboreo nomen ab orbe tulit; 20
templa deis, mores populis dedit, otia ferro,
astra suis, caelo sidera, serta Iovi.
Saepe, non concessa facultate agendi triumphos Parthicos, uictor consecutus est nomen ab orbe septemtrionali. Donauit Deos templis, populos moribus, arma quiete, suos astris, caelum sideribus, Iouem coronis.
Herculeum tantis numen non sufficit actis:
Tarpeio deus hic commodet ora patri.
Herculeum numen non sufficit tantis factis: hic Deus Domitianus suo uultu referat Tarpeium patrem.
CII.
Quadringentorum reddis mihi, Phoebe, tabellas:
centum da potius mutua, Phoebe, mihi.
quaere alium cui te tam vano munere iactes
quod tibi non possum solvere, Phoebe, meum est.
O Phoebe, reddis mihi tabellas quadringentorum: o Phoebe, potius crede mihi centum. Quaere alium, apud quem te ostentes tam uano dono: o Phoebe, quod nequeo soluere, pertinet ad me.
CIII.
Quae nova tam similis genuitibi Leda ministros?
quae capta est alio nuda Lacaena cycno?
Quae noua Leda peperit tibi seruos tam similes? Quae Lacaena arsit alium cycnum?
dat faciem Pollux Hiero, dat Castor Asylo,
atque in utroque nitet Tyndaris ore soror.
Pollux commodat uultum Hiero, Castor commodat Asillo: et soror Tyndaris nitet in ore utriusque.
ista Therapnaeis si forma fuisset Amyclis, 5
cum vicere duas dona minora deas,
mansisses, Helene, Phrygiamque redisset in Iden
Dardanius gemino cum Ganymede Paris.
Si talis pulchritudo fuisset Therapnaeis Amyclis, cum dona inferiora superarunt duas Deas: o Helene, mansisses, et Dardanius Paris reuersus esset in urbem Phrygiam cum gemino Ganymede.
<back | Page 21
