M. Valerii Martialis Epigrammata De Spectaculis

Page 1 | next>

I.

Barbara pyramidum sileat miracula Memphis,
Assyrius iactet nec Babylona labor;
nec Triuiae templo molles laudentur Iones,
dissimulet Delon cornibus ara frequens
aere nec uacuo pendentia Mausolea 5
laudibus inmodicis Cares in astra ferant.
Omnis Caesareo cedit labor Amphitheatro,
unum pro cunctis fama loquetur opus.

Barbara Memphis taceat admirandas pyramides, nec labor improbus ostentet Babylona: nec celebrentur delicata ornamenta templi Dianae, et ara referta cornibus sileat Deum: nec Cares commendatione nimia in caelum tollant monumentum Mausoli suspensum in aëre uacuo. Omne opus det primas Amphitheatro Caesaris, et fama praedicet unicum illud aedificium pro omnibus.

Page 1 | next>