II.
Hic ubi sidereus propius uidet astra colossus
et crescunt media pegmata celsa uia,
inuidiosa feri radiabant atria regis
unaque iam tota stabat in urbe domus;
hic ubi conspicui uenerabilis Amphitheatri 5
erigitur moles, stagna Neronis erant;
hic ubi miramur uelocia munera thermas,
abstulerat miseris tecta superbus ager;
Claudia diffusas ubi porticus explicat umbras,
ultima parts aulae deficientis erat. 10
Reddita Roma sibi est et sunt te preside, Caesar,
deliciae populi, quae fuerant domini.
Odiosa aula crudelis regis Neronis his splendebat, et iam unicum domicilium erat in tota ciuitate, ubi radiatus colossus aspicit astra propius, et pegmata alta surgunt media uia. Hic erant stagna Neronis ubi exstruitur moles ueneranda spectandi Amphitheatri. Hic campus superbus eripuerat domos ab aerumnosis ciuibus, ubi nobis admirationi sunt balnea celeriter exstructa. Extrema pars erat atrii desinentis, ubi Claudia porticus dilatat umbras. Roma sibi restituta est, et, te Imperatore, Caesar, sunt populi, quae fuerant uoluptates domini Neronis.
