Page 1 | next>
Ode I.
Maecenas atauis edite regibus,
o et praesidium et dulce decus meum,
O Maecenas, orte a maioribus proceribus, o et meum columen, et cara mea gloria!
sunt quos curriculo puluerem Olympicum
collegisse iuuat metaque feruidis
euitata rotis palmaque nobilis 5
terrarum dominos euehit ad deos;
sunt plerique, qui decurrentes gaudent conspergi pulvere Olympico, et quos meta non tacta rotis calidis, ac illustris victoria extollit ad Deos orbis moderatores.
hunc, si mobilium turba Quiritium
certat tergeminis tollere honoribus;
illum, si proprio condidit horreo
quicquid de Libycis uerritur areis. 10
Gaudentem patrios findere sarculo
agros Attalicis condicionibus
numquam demoueas, ut trabe Cypria
Myrtoum pauidus nauta secet mare.
Hunc, si conventus Romanorum inconstantium certatim evehit ad maximas dignitates; illum, si, congessit in suum granarium quicquid colligitur ex areis Libyae; gestientem scindere sarculo rura paterna, nunquam deducas de proposito, etiam promissione opum Attali, ut nauta timidus findat navi Cypria undas pelagi Myrtoi.
Luctantem Icariis fluctibus Africum 15
mercator metuens otium et oppidi
laudat rura sui; mox reficit rates
quassas, indocilis pauperiem pati.
Mercator timens Africum ventum pugnantem cum aquis maris Icarii, commendat quietem, et agros sui pagi, paulo post tamen resarcit naves laceras, paupertatis impatiens.
Est qui nec ueteris pocula Massici
nec partem solido demere de die 20
spernit, nunc uiridi membra sub arbuto
stratus, nunc ad aquae lene caput sacrae.
Est alius qui non contemnit cyathos vini Massici veteris, neque detrahere aliquot horas ex die integro, modo iacentes habens artus sub arbuto virenti, modo ad originem placidam fontis sacrati.
Multos castra iuuant et lituo tubae
permixtus sonitus bellaque matribus
detestata. Manet sub Ioue frigido 25
uenator tenerae coniugis inmemor,
seu uisa est catulis cerua fidelibus,
seu rupit teretis Marsus aper plagas.
Militia placet multis sonusque buccinae ac litui mixtus, et bella matribus execranda. Venator oblitus delicatae uxoris moratur sub aere frigenti sive canes fidi conspexerunt cervam, sive aper Marsus fregit retia rotunda.
Me doctarum hederae praemia frontium
dis miscent superis, me gelidum nemus 30
Nympharumque leues cum Satyris chori
secernunt populo, si neque tibias
Euterpe cohibet nec Polyhymnia
Lesboum refugit tendere barbiton.
Hederae vero, merces doctorum capitum me collocant inter summos Deos: me silva frigida et celeres choreae Nympharum cum Satyris segregant a vulgo; si neque Euterpe fistulas coercet neque Polyhymnia dedignatur intendere lyram Lesbiam.
Quod si me lyricis uatibus inseres, 35
sublimi feriam sidera uertice.
Quod si me annumeres Poetis Lyricis, caelum attigam excelso capite.
Page 1 | next>
