Ode II.
Iam satis terris niuis atque dirae
grandinis misit Pater et rubente
dextera sacras iaculatus arces
terruit Vrbem,
Iupiter iam in terras immisit sat nivis et horrendae grandinis: vibransque fulmina in sacras arces manu flammata, Romae terrorem incussit.
terruit gentis, graue ne rediret 5
saeculum Pyrrhae noua monstra questae,
omne cum Proteus pecus egit altos
uisere montis,
piscium et summa genus haesit ulmo,
Alias etiam nationes fecit timere, ne rediret triste tempus Pyrrhae conquerentis ob prodigia inaudita: quando Proteus totum armentum duxit in excelsos montes atque piscium genus adhaesit ulmi fastigo;
nota quae sedes fuerat columbis, 10
et superiecto pauidae natarunt
aequore dammae.
qui locus fuerat columbis cognitus: necnon dammae timidae nataverunt in mari superfuso.
Vidimus flauom Tiberim retortis
litore Etrusco uiolenter undis
ire deiectum monumenta regis 15
templaque Vestae,
Iliae dum se nimium querenti
iactat ultorem, uagus et sinistra
labitur ripa Ioue non probante
uxorius amnis. 20
Aspeximus flavum Tiberim ire prostratum monumenta Regis Numae et aedem Vestae, aquis magno impetu reflexis a ripa Tusciam spectante: dum hic fluvius, Iove indignante, nimium indulgens uxori Iliae dolenti praeter modum, se vindicem ostentat atque in laevum litus errat exundans.
Audiet ciuis acuisse ferrum,
quo graues Persae melius perirent,
audiet pugnas uitio parentum
rara iuuentus.
Iuvenes pauci culpa parentum audient aliquando Romanos strinxisse gladios, quibus iuste magis confoderentur Persae graves; discentque bella civilia.
Quem uocet diuum populus ruentis 25
imperi rebus? Prece qua fatigent
uirgines sanctae minus audientem
carmina Vestam?
Quem Deorum populus invocet labente Republica? Quibus votis instabunt Virgines sacratae apud Vestam obsecrationes minime suscipientem?
Cui dabit partis scelus expiandi
Iuppiter? Tandem uenias precamur, 30
nube candentis umeros amictus,
augur Apollo,
siue tu mauis, Erycina ridens,
quam Iocus circumuolat et Cupido,
siue neglectum genus et nepotes 35
respicis, auctor,
heu nimis longo satiate ludo,
quem iuuat clamor galeaeque leues,
acer et Mauri peditis cruentum
uoltus in hostem, 40
Cui Iupiter dabit munus eluendi crimen? O Phoebe fatidice, obsecramus ut succurras, albos humeros nube velatos habens: seu vis potius adesse, o blanda Venus, circa quam Ioci et Amores volitant: seu abiectam prolem atque posteros respicis, O Mars Romanae gentis parens, eheu bello nimis diuturno satiate, qui gaudes vociferationibus et galeis politis, atque aspectu Mauri peditis erga saevum adversarium feroci.
siue mutata iuuenem figura
ales in terris imitaris, almae
filius Maiae, patiens uocari
Caesaris ultor.
Serus in caelum redeas diuque 45
laetus intersis populo Quirini,
neue te nostris vitiis iniquum
ocior aura
tollat; hic magnos potius triumphos,
hic ames dici pater atque princeps, 50
neu sinas Medos equitare inultos
te duce, Caesar.
Sive immutata specie adolescentem exhibes in terra, tu alatus filius benignae Maiae, sinens te dici vindicem Iulii Caesaris: tarde remigres in caelum; diuque maneas cum populo Romano, neque celerior ventus rapiat te nostris criminibus infesum: Ama potius hic ingentes triumphos, et appellationem parentis auctorisque; neque patiaris, O Caesar, te imperante, Medos impune in equis vagari.
