Ode III.
Sic te diua potens Cypri,
sic fratres Helenae, lucida sidera,
uentorumque regat pater
obstrictis aliis praeter Iapyga,
Ita te salvam ducant Cypri Domina, et Helenae fratres, astra fulgentia, et parens ventorum, conclusis reliquis, excepto Iapyge;
nauis, quae tibi creditum 5
debes Vergilium; finibus Atticis
reddas incolumem precor
et serues animae dimidium meae.
o navis, quae debes Virgilium tibi commissum, oro ut eum sospitem applices ad litus Atheniense, ac tuearis partem dimidiam animae meae.
Illi robur et aes triplex
circa pectus erat, qui fragilem truci 10
commisit pelago ratem
primus, nec timuit praecipitem Africum
decertantem Aquilonibus
nec tristis Hyadas nec rabiem Noti,
quo non arbiter Hadriae 15
maior, tollere seu ponere uolt freta.
Is profecto circa cor habebat lignum tresque aeris laminas, qui primus mari saevo credidit navem frangi facilem neque metuit Africum violentum cum Borea pugnantem, neque Hyadas noxias, neque furorem Austri; quo nullus est dominator in Adriatico mari potentior, sive concitare sive placare fluctus velit.
Quem mortis timuit gradum
qui siccis oculis monstra natantia,
qui uidit mare turbidum et
infamis scopulos Acroceraunia? 20
Quod mortis genus formidavit, qui sine lacrimis aspexit pisces monstrosos nantes, ac mare intumescens, et Acroceraunias rupes naufragiis famosas?
Nequicquam deus abscidit
prudens Oceano dissociabili
terras, si tamen impiae
non tangenda rates transiliunt uada.
Frustra Deus providus terram segregavit a mari disiungendo: si naves sceleratae transeunt nihilominus vada minime tentanda.
Audax omnia perpeti 25
gens humana ruit per uetitum nefas;
Mortalium genus quidlibet aggredi non veretur, ferturque ad facinora prohibita.
audax Iapeti genus
ignem fraude mala gentibus intulit;
Temerarius Iapeti filius populis advexit ignem furto improbo.
post ignem aetheria domo
subductum macies et noua febrium 30
terris incubuit cohors
semotique prius tarda necessitas
leti corripuit gradum.
Post ignem caelo subreptum terras invasit macies et frequentia morborum insolita atque sera necessitas mortis antea dilatae passum acceleravit.
Expertus uacuum Daedalus aera
pennis non homini datis; 35
Daedalus per inanem aërem volare tentavit alis homini non concessis.
perrupit Acheronta Herculeus labor.
Vis Herculis sibi patefecit aditum ad Inferos.
Nil mortalibus ardui est;
caelum ipsum petimus stultitia neque
Nihil est hominibus intentatum, Caelum ipsum affectamus per dementiam.
per nostrum patimur scelus
iracunda Iouem ponere fulmina. 40
Et nostris criminibus non sinimus Iovem iratum dimittere fulmina.
