Ode XIX.
Bacchum in remotis carmina rupibus
uidi docentem, credite posteri,
Nymphasque discentis et auris
capripedum Satyrorum acutas.
Bacchum versus dictantem in secretis aspexi cautibus, et Nymphas auscultantes, arrectasque aures Satyrorum caprinos pedes habentium. Fidem habete, nepotes.
Euhoe, recenti mens trepidat metu 5
plenoque Bacchi pectore turbidum
laetatur. Euhoe, parce Liber,
parce, graui metuende thyrso.
Euhoë timore nuper incusso agitatur animus, et ob repletum Baccho pectus, non sine gaudio conturbatur. Euhoë! Indulge, Bacche, indulge, verendo thyrso formidante.
Fas peruicacis est mihi Thyiadas
uinique fontem lactis et uberes 10
cantare riuos atque truncis
lapsa cauis iterare mella;
fas et beatae coniugis additum
stellis honorem tectaque Penthei
disiecta non leni ruina, 15
Thracis et exitium Lycurgi.
Licet mihi cantare Bacchantes protervas, et vinum defluents, et lac copiose manants, et mel ex cavatis arboribus stillants, celebrare; necnon felicis uxoris ornamentum, astris insertum; Pentheique domum gravi deturbatam casu et Lycurgi Thracii mortem.
Tu flectis amnes, tu mare barbarum,
tu separatis uuidus in iugis
nodo coerces uiperino
Bistonidum sine fraude crinis. 20
Tu domas fluvios, et mare longinquum. Tu secretis in montibus Thraciarum mulierum capillos nodo serpentino citra periculum constringes vino madens.
Tu, cum parentis regna per arduum
cohors Gigantum scanderet inpia,
Rhoetum retorsisti leonis
unguibus horribilique mala;
quamquam, choreis aptior et iocis 25
ludoque dictus, non sat idoneus
pugnae ferebaris; sed idem
pacis eras mediusque belli.
Cum vero scelerata Gigantum turma per sublime appeteret imperium Iovis patris tui, tu Rhaetum deiecisti leonis unguibus, ac terribili maxillā: quamvis saltationibus, cavillationibus, lusibusque habebaris magis idoneus, nec ita ad certamina habilis: verumtamen paci atque bello communis eras.
Te uidit insons Cerberus aureo
cornu decorum leniter atterens 30
caudam et recedentis trilingui
ore pedes tetigitque crura.
Innoxius te Cerberus aspexit aureo cornu insignem, movens caudam leviter, et regredientis pedes cruraque triplici lingua et ore delinxit.
