Ode II.
Angustam amice pauperiem pati
robustus acri militia puer
condiscat et Parthos ferocis
uexet eques metuendus hasta
uitamque sub diuo et trepidis agat 5
in rebus. Illum ex moenibus hosticis
matrona bellantis tyranni
prospiciens et adulta uirgo
suspiret, eheu, ne rudis agminum
sponsus lacessat regius asperum 10
tactu leonem, quem cruenta
per medias rapit ira caedes.
O, amici, puer gravi bello fortis discat tolerare arctam inopiam; atque bellicosos Parthos urgeat equitans, telo formidabilis: sub aperto caelo degat etiam inter pericula. Illum e muris hostium videns uxor Regis proeliantis, et grandior puella, ingemat; Heu! Ne maritus regalis certaminum imperitus incurrat in istum leonem conflictu saevum, quem furor sanguinolentus agit in medias strages.
Dulce et decorum est pro patria mori:
mors et fugacem persequitur uirum
nec parcit inbellis iuuentae
poplitibus timidoue tergo. 15
Iucundum atque gloriosum est occumbere pro patriā. Fugientem etiam hominem mors consectatur nec indulget ignavis adolescentibus genu trementibus et dorsum vertentibus.
Virtus, repulsae nescia sordidae,
intaminatis fulget honoribus
nec sumit aut ponit securis
arbitrio popularis aurae. 20
Virtus turpem repulsam ignorat; puris honoribus decoratur; neque accipit vel deponit fasces ad voluntatem plebis faventis.
Virtus, recludens inmeritis mori
caelum, negata temptat iter uia
coetusque uolgaris et udam
spernit humum fugiente pinna.
Virtus, Olympum aperiens dignis immortalitate, semitas init arduas: vulgi turbam despicit, ac terram humidam linquit, alā fugaci assurgens.
Est et fideli tuta silentio 25
merces: uetabo, qui Cereris sacrum
uolgarit arcanae, sub isdem
sit trabibus fragilemque mecum
soluat phaselon; saepe Diespiter
neglectus incesto addidit integrum, 30
raro antecedentem scelestum
deseruit pede Poena claudo.
Fidae taciturnitati securum quoque constat praemium. Qui revelarit secreta mysteria Cereris, prohibebo ne sub eodem tecto maneat, neve cymbam levem impellat mecum. Etentim haud raro Iupiter spretus innocentem scelerato iunxit et vix unquam flagitiosum fugientem dimisit punitio lento gressu insequens.
