Page 1 | next>
Ode I.
Intermissa, Venus, diu
rursus bella moues? Parce precor, precor.
Interrupta dudum Venus, iterum praelia indicis. Abstine, oro obtestorque.
Non sum qualis eram bonae
sub regno Cinarae. Desine, dulcium
mater saeua Cupidinum, 5
circa lustra decem flectere mollibus
iam durum imperiis: abi,
quo blandae iuuenum te reuocant preces.
Non sum qui eram sub dominio benignae Cinarae. Crudelis parens amorum suauium, parce me intractabilem subiicere dulcibus imperiis, circa decem lustra. Ito quo inuitant te uota adolescentium amore plena.
Tempestiuius in domum
Pauli purpureis ales oloribus 10
comissabere Maximi,
si torrere iecur quaeris idoneum;
Opportunius lasciuies in aedibus Pauli Maximi; illuc i uelox cycnis purpureis, si cupis aptum hepar inflammare.
namque et nobilis et decens
et pro sollicitis non tacitus reis
et centum puer artium 15
late signa feret militiae tuae,
et, quandoque potentior
largi muneribus riserit aemuli,
Albanos prope te lacus
ponet marmoream sub trabe citrea. 20
Is enim iuuenis, et nobilis, et pulcher, et pro reis anxiis haud mutus, ac multiplici industria praeditus, longe portabit uexilla tuae militiae. Et cum riualis donis amplis superbi uictor gaudebit, prope lacus Albanos te e marmore effictam locabit sub tabe e citre.
Illic plurima naribus
duces tura, lyraque et Berecyntia
delectabere tibia
mixtis carminibus non sine fistula;
Ibi thus multum naso hauries, et recreaberis carminibus iunctis citharae, et tibiae Berecynthiae et fistulae.
illic bis pueri die
numen cum teneris uirginibus tuum 25
laudantes pede candido
in morem Salium ter quatient humum.
Ibi pueri cum puellis numen tuum bis in die collaudantes albis pedibus terram pulsabunt ter, ritu Saliorum.
Me nec femina nec puer
iam nec spes animi credula mutui 30
nec certare iuuat mero
nec uincire nouis tempora floribus.
Modo me neque mulier, neque puer, neque facilis spes mutui amoris oblectat, nec uino contendere, neque floribus caput coronare.
Sed cur heu, Ligurine, cur
manat rara meas lacrima per genas?
Cur facunda parum decoro 35
inter uerba cadit lingua silentio?
At quare, Ligurine, eheu quare per malas meas fluunt aliquot stillae? Quare lingua diserta in uocibus haesitat silentio non decenti?
Nocturnis ego somniis
iam captum teneo, iam uolucrem sequor
te per gramina Martii
campi, te per aquas, dure, uolubilis. 40
Ego te nocte in somnis modo prehensum amplector, modo te per herbam campi Martii, te per undas fluentes, o crudelis, fugientem prosequor.
Page 1 | next>
