XXIV. ACILIO GLABRIONI GRAMMATICO IUN. BURDIGALENSI
DOCTRINAE uitaeque pari breuitate caducum,
Glabrio, te maestis commemorabo elegis.
Glabrio, maestis uersibus celebrabo te, cuius doctrina et uita breui aeuo pariter circumscriptae fuerunt.
stemmate nobilium deductum nomen auorum,
Glabrio Aquilini, Dardana progenies.
Nomen tuum deducitur ab auis nobilibus, o Glabrio, qui Aquilinum Troianum agnoscis generis tui auctorem.
tu quondam puero compar mihi discipulo: mox,
me dehinc facto rhetore grammaticus.
Tu, cum puer essem, meus fuisti condiscipulus, mox Grammaticus, ubi ego Rhetor euasi.
inque foro tutela reis et cultor in agris,
digne, diu partis qui fruerere bonis.
Tu reis in foro praesidium, et colonus rure, dignus qui fruerere diu opibus acquisitis;
commode, laete, benigne, abstemie, tam bone dandis
semper consiliis, quam taciturne datis. 10
commodus, hilaris, mansuetus, abstinens a uino, tam bonus semper in dandis consiliis, quam, ubi dederas, taciturnus.
tam decus omne tuis quam mox dolor, omnia acerbo
funere praereptus, Glabrio, destituis :
uxore et natis, genitore et matre relictis,
eheu quam multis perdite nominibus !
Tam omne tuorum ornamentum, quam mox fuisti desiderium, morte crudeli raptus, o Glabrio, cuncta deseris. Relictis uxore et natis, relictis parentibus, eheu quam multis nominibus periisti!
flete diu nobis, nunquam satis, accipe acerbum, 15
Glabrio, in aeternum commemorate, uale.
o Glabrio, quem diu luximus, nec unquam satis lugebimus, in aeternum celebrate, acerbum uale accipias uelim.
